پہلا ٹیسٹ، آسٹریلیا نے پاکستان کو اننگز اور 5 رنز سے شکست دیدی

پاکستان اور آسٹریلیا کے درمیان پہلے ٹیسٹ میں میزبان ٹیم نے گرین کیپس کو اننگز اور 5 رنز سے شکست دیدی۔ برسبین کے گابا اسٹیڈیم میں کھیلے گئے ٹیسٹ میں پاکستانی ٹیم اپنی دوسری اننگز میں 335 رنز بنا کر آؤٹ ہو گئی۔ چوتھے روز کے کھیل کا آغاز ہوا تو شان مسعود 27 اور بابراعظم 20 رنز کے ساتھ وکٹ پر موجود تھے، شان مسعود زیادہ دیر وکٹ پر نہ ٹھہر سکے اور اپنے گزشتہ روز کے اسکور میں 15 رنز کے اضافے کے بعد 42 رنز بنا کر آؤٹ ہو گئے۔ نئے آنے والے بلے باز افتخار احمد بھی صرف 4 گیندوں کے مہمان ثابت ہوئے اور بغیر کوئی رن بنائے واپس لوٹ گئے۔

5 وکٹیں گرنے کے بعد بابراعظم اور محمد رضوان نے ذمہ دارانہ بیٹنگ کا مظاہرہ کیا اور دونوں کھلاڑیوں کے درمیان 132 رنز کی شراکت قائم ہوئی۔ اس دوران بابر اعظم نے اپنی سنچری بھی مکمل کی اور وہ 104 رنز بنا کر آؤٹ ہوئے۔

قومی ٹیم کے وکٹ کیپر بلے باز محمد رضوان بھی 95 رنز کی اچھی اننگز کھیل کر نروس نائنٹیز کا شکارہو گئے جب کہ یاسر شاہ نے بھی اپنے ٹیسٹ کیرئیر کا سب سے زیادہ 42 اسکور کیا۔ شاہین شاہ آفریدی 10 اور عمران خان 5 رنز بنا کر آؤٹ ہوئے۔

آسٹریلیا کی جانب سے جوش ہیزل وڈ نے 4، مچل اسٹارک نے 3 اور پیٹ کمنز نے دو کھلاڑیوں کو آؤٹ کیا جب کہ ایک وکٹ ناتھن لیون کے حصے میں آئی۔ مارنس لبوشین کو  185 رنز کی شاندار اننگز کھیلنے پر میچ کا بہترین کھلاڑی قرار دیا گیا۔

خیال رہے کہ پاکستان نے اپنی پہلی اننگز میں 240 رنز اسکور کیے تھے جس کے جواب میں آسٹریلیا نے پہلی اننگز میں 580 رنز بنائے تھے اور اس طرح میزبان ٹیم کو مہمان ٹیم پر 340 رنز کی سبقت حاصل ہوئی تھی۔