پاکستان کے صوبہ سندھ کے ایک استاد دو سال کی کوششوں کے بعد گینیز ورلڈ ریکارڈ میں اپنے خاندان کا نام شامل کرانے میں کامیاب ہوگئے ہیں

پاکستان کے صوبہ سندھ کے ایک استاد دو سال کی کوششوں کے بعد گینیز ورلڈ ریکارڈ میں اپنے خاندان کا نام شامل کرانے میں کامیاب ہوگئے ہیں، ان کے گھر کے 9 افراد ایک ہی تاریخ یعنی یکم اگست پر پیدا ہوئے ہیں۔
امیر علی نے امریکی شہری کا ریکارڈ توڑا ہے، گینز ورلڈ رکارڈ 1966 مطابق کیمنز خاندان کے 5 بچے ایک ہی تاریخ یعنی 20 فروری کو پیدا ہوئے تھے۔
امیر علی منگی کا تعلق لاڑکانہ کے علاقہ دھامراہ سے ہے اور وہ ہائی سکول میں استاد ہیں۔ انھوں نے بتایا کہ وہ یکم اگست 1968 کو پیدا ہوئے، ان کی بیوی کی پیدائش یکم اگست 1973 کی ہے ان کی پہلی اولاد بیٹی سندھو امیر یکم اگست 1990 میں پیدا ہوئی اس کے بعد جڑواں بیٹیاں سسّی اور سپنا یکم 1998، بیٹا عامر یکم اگست 2001، اس کے بعد بیٹا امبر یکم اگست 2002 اور اس کے بعد جڑواں بیٹے عمار اور احمر یکم اگست 2003 کو پیدا ہوئے۔
امیر علی منگی علم نجوم پر یقین رکھتے ہیں ان کا کہنا ہے کہ ان کا برج اسد ہے زندگی میں جو بھی واقعات ہوتے ہیں اس میں ایک کا ہندسہ لکی نمبر ہوتا ہے انھوں نے جب محکمۂ تعلیم میں جوائن کیا تو اس میں بھی یکم اگست تھی اس طرح ان کی شادی بھی یکم اگست کو ہوئی تھی لکی نمبر ہونے کی وجہ سے انھوں نے یہ تاریخ مقرر کی تھی۔
امیر منگی پامسٹ اور شاعر بھی ہیں انھوں نے سوشیالوجی، آئی آر، اکنامکس سمیت متعدد ماسٹرس ڈگریاں بھی حاصل کی ہوئی ہیں، انھوں نے بتایا کہ پورا خاندان کی سالگرہ کا ایک دن ہی کیک کاٹ لیتے ہیں۔