جاپان پاکستان کے سرکاری افسران کو اعلیٰ تعلیم فراہم کرے گا، معاہدہ طے پا گیا

اسلام آباد(مانیٹرنگ ڈیسک) جاپانی حکومت اپنے ملک کی اعلی یونیورسٹیوں میں پاکستان کے سرکاری افسران کو2سال کیلئے ماسٹر ڈگری پروگرام کیلئے17اور ڈاکٹریٹ پروگرام کیلئے 3سال کیلئے1 اسکالرشپ فراہم کرے گی۔
پاکستان کے انسانی وسائل کی ترقی کیلئے اسکالرشپ کے منصوبہ کیلئے جاپانی گرانٹ ایڈ کیلئے وزارت اقتصادی امور میں دستخط کی تقریب منعقد ہوئی۔
معاہدے کے تحت حکومت جاپان مالی سال2022کیلئے ہیومن ریسورس ڈویلپمنٹ اسکالرشپ کے پروجیکٹ کے لیے حکومت پاکستان کو 313ملین جاپانی ین یعنی تقریبا23لاکھ امریکی ڈالرکی امداد فراہم کرے گی۔
گرانٹ کے لیے تحریری دستاویزات کے تبادلے اور تبادلہ خیال کے ریکارڈ پر وزارت اقتصادی امور کے سیکرٹری میاں اسد حیا الدین اور اسلام آباد میں جاپان کے سفارت خانے کے ناظم الامور ایشی کینسوکے نے دستخط کیے۔
جاپان انٹرنیشنل کوآپریشن ایجنسی کے چیف نمائندے یسو میتسو کینو شیتا اور وزارت اقتصادی امور کے جوائنٹ سیکرٹری عادل اکبر خان نے منصوبے پرعملدرآمدکی تفصیلات سے متعلق ایک گرانٹ معاہدے پر بھی دستخط کیے۔
اس اسکالرشپ کے ذریعے جاپانی حکومت اپنے ملک کی اعلی یونیورسٹیوں میں وفاقی حکومت کے افسران کو2سال کیلئے ماسٹر ڈگری پروگرام کے لیے 17اور ڈاکٹریٹ پروگرام کے لیے 03سال کے لیے 1اسکالرشپ فراہم کرے گی۔
یہ پروگرام پہلی بار پاکستان میں 2018میں متعارف کرایا گیا تھا اوراس وقت سے اب تک جیڈی ایس فیلو کے4بیچوں نے اس اسکالرشپ سے استفادہ کیاہے۔جے ڈی ایس کا بنیادی مقصد حکومت پاکستان کی انتظامی استعدادکو مضبوط کرنا ہے تاکہ پاکستان کی سماجی اور اقتصادی ترقی کی تشکیل اور عملدرآمدمیں شامل قابل سرکاری افسران کو ماسٹر اور ڈاکٹر آف فلسفہ کی ڈگری حاصل کرنے کا موقع فراہم کیا جائے ۔
وزارت اقتصادی امور کے سیکرٹری میاں حیاالدین نے جاپان کی حکومت اور عوام کے تعاون کو سراہاہے اور مستقبل میں دونوں اطراف کے درمیان مزید تعاون کے لیے تمام ضروری سہولتیں فراہم کرنے کی یقین دہانی کرائی۔