آسیہ کیس، ڈی جی آئی ایس پی آر نے ہر معاملے میں فوج گھسیٹنے کو افسوسناک قرار دیا

اسلام آباد ۔ ترجمان پاک فوج ڈی جی آئی ایس پی آر میجر جنرل آصف غفور  نے کہا ہے کہ آسیہ بی بی کا کیس قانونی معاملہ ہے لیکن اس میں فوج کو گھسیٹا گیا اور ہر مسئلے میں فوج کو گھسیٹنا افسوسناک ہے۔
سرکاری ٹی وی سے گفتگو کرتے ہوئے میجر جنرل آصف غفور نے کہا کہ آسیہ بی بی کا کیس گزشتہ 10 برس سے عدالتوں میں چل رہا ہے اور یہ قانونی معاملہ ہے، بہتر ہوگا کہ آسیہ مسیح کے معاملے میں قانونی عمل کو مکمل ہونے دیا جائے۔
میجر جنرل آصف غفور کا کہنا تھا کہ تمام مسلمانوں کا حضور پاک ﷺ سے محبت کا رشتہ ہے اور اس رشتے پر کوئی سمجھوتہ نہیں ہوسکتا۔ انہوں نے یہ بھی کہا کہ اسلام ہمیں امن، درگزر اور محبت کا درس دیتا ہے۔
ڈی جی آئی ایس پی آر نے کہا کہ ملک میں امن وامان کی صورتحال برقرار رکھی جائے، ہمیں اسلامی تعلیمات اور قانون کو نہیں چھوڑنا چاہیے اور چاہتے ہیں کہ صورتحال پُرامن طریقے سے حل ہوجائے۔
میجر جنرل آصف غفور نے کہا کہ افواج پاکستان پچھلی 2 دہائیوں سے دہشت گردی کے خلاف جنگ میں مصروف ہیں، آئین اور قانون کے احترام کے ساتھ فوج کے خلاف بیانات سے گریز کیا جائے، ہم دہشت گردی کے خلاف جنگ جیتنے کے قریب ہیں اور ہماری توجہ نہ ہٹائی جائے۔
یاد رہے کہ سپریم کورٹ نے 31 اکتوبر کو آسیہ بی بی کی توہین رسالت کے الزام پر سزائے موت کے خلاف اپیل پر فیصلہ سناتے ہوئے اسے رہا کرنے کا حکم دیا جس پر مذہبی جماعتوں کی جانب سے شدید احتجاج کیا جارہا ہے۔