میدان کے بجائے پاکستانی کرکٹرز نے ہوٹل میں میچ کھیلا جس کی ویڈیو وائرل ہو گئی
18 اپریل سے پاکستان اور نیوزی لینڈ کے درمیان ٹی ٹوئنٹی سیریز کا آغاز ہوگا مگر بارش کے باعث قومی کرکٹرز نے پریکٹس منسوخ ہونے پر ہوٹل میں کرکٹ کھیلنا شروع کر دی۔ ابتدائی تین میچز پنڈی کرکٹ اسٹیڈیم آخری دو میچز جبکہ قذافی اسٹیڈیم لاہور میں کھیلیں جائیں گے۔دونوں ٹیمیں سیریز کے لیے اسلام آباد میں موجود ہیں تاہم گزشتہ روز بارش کے باعث قومی ٹیم کا پریکٹس سیشن منسوخ کر دیا گیا جبکہ بارش سیریز کے میچوں کے دوران بھی رکاوٹ بن سکتی ہے۔
اس کا حل پریکٹس سے محروم قومی کرکٹرز نے انڈور کرکٹ میں ڈھونڈ نکالا اور ہوٹل کے اندر ہی کرکٹ کھیلنا شروع کر دی۔انسٹا گرام پر پاکستان کرکٹ بورڈ نے اپنے اکاؤنٹ سے ایک ویڈیو شیئر کی ہے جس میں محمد عامر، عماد وسیم، شاہین آفریدی، زمان خان اور ابرار احمد نے ہوٹل کے کوریڈور میں میچ کھیلتے دکھائی دے رہے ہیں۔یہ دلچسپ ویڈیو پی سی بی کے شیئر کرتے ہی سوشل میڈیا پر تیزی سے وائرل ہو گئی ہے اور صارفین اس پر دلچسپ تبصرے بھی کر رہے ہیں۔