ورلڈ چیمپئین شپ آف لیجنڈز کے فائنل میں بھارت نے پاکستانی ٹیم کو ہرادیا

برمنگھم کے ایجبسٹن اسٹیڈیم میں کھیلے گئے فائنل میں پاکستان چیمپئن نے ٹاس جیت کر پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 156 رنز بنائے
جواب میں بھارت نے 157 رنز کا ہدف 19.1 اوورز میں 5 وکٹوں کے نقصان پر مکمل کرکے ٹائٹل اپنے نام کرلیا ۔
پاکستان کی طرف سے شعیب ملک 41، کامران اکمل 24 اور صہیب مقصود 21 رنز کے ساتھ نمایاں رہے۔
شرجیل خان نے 12، یونس خان اور عامر یامین نے 7، 7 رنز بنانے میں کامیاب ہو سکے۔ مصباح الحق 18 رنز بناکر ناٹ آؤٹ ریٹائرڈ ہرٹ ہوئے۔ شاہد آفریدی 4 اور سہیل تنویر 19 رنز کے ساتھ ناٹ آؤٹ رہے۔
بھارت کی طرف سے انوریت سنگھ نے 3، عرفان پٹھان، پون نگی، اور ونے کمار نے ایک، ایک وکٹ اپنے نام کی۔
157 رنزہدف کے تعاقب میں بھارت کی طرف سے امباتی رایودو نے نصف سنچری اسکور کی، گرکیرت سنگھ مان 34 اور یوسف پٹھان 30 رنز کے ساتھ نمایاں رہے۔
روبن اتھاپا نے 10 اور سریش رائنا نے 4 رنز اسکور کیے۔ یووراج سنگھ 15 اور عرفان پٹھان 5 رنز کے ساتھ ناٹ آؤٹ رہے۔
پاکستان کی طرف سے عامر یامین 2، سعید اجمل، وہاب ریاض اور شعیب ملک نے ایک، ایک وکٹ اپنے نام کی۔
قومی ٹیم نے راؤنڈ مقابلوں میں بہترین فارم کا مظاہرہ کرتے ہوئے 5 میں 4 میچز میں کامیابی حاصل کی جبکہ روایتی حریف بھارت کو بھی شکست سے دوچار کیا تھا۔