سیکیورٹی فورسز کے ڈیرہ اسماعیل خان اور جنوبی وزیرستان میں دو کامیاب آپریشنز کے دوران تین دہشت گردوں کو منطقی انجام تک پہنچا دیا گیا۔ پاک فوج کے شعبہ تعلقات عامہ ( آئی ایس پی آر ) کے مطابق سیکیورٹی فورسز نے ڈیرہ اسماعیل خان کے علاقے کلاچی میں دہشتگردوں کیخلاف کارروائی کی جس کے دوران فائرنگ کے تبادلے میں دو دہشت گرد مارے گئے۔
آئی ایس پی آر کے مطابق دوسری کارروائی جنوبی وزیرستان کے علاقے کوٹ اعظم میں کی گئی جہاں دوران آپریشن ایک دہشت گرد ہلاک ہوا۔ دونوں کارروائیوں میں دہشت گردوں سے بھاری اسلحہ اور گولہ بارود بھی برآمد کیا گیا ہے۔ تینوں ہلاک دہشت گرد سیکیورٹی فورسز اور عوام پر حملوں میں ملوث تھے۔ دوسری طرف شمالی وزیرستان کے علاقے گڑیوم میں بارودی سرنگ کے دھماکے سے ایک جوان شہید ہو گیا، 26 سالہ شہید سپاہی شہباز کا تعلق ضلع راولپنڈی سے تھا۔
