کوہاٹ میں پولیس کی چیک پوسٹ پر حملے میں تین پولیس اہلکاروں سمیت 4 افراد شہید ہو گئے۔ پولیس کے مطابق یہ واقعہ کوہاٹ میں انڈس ہائی وے پر لاچی ٹول پلازہ اور چیک پوسٹ پر پیش آیا جہاں دس کے قریب دہشتگردوں نے حملہ کیا۔ حملے میں تین پولیس اہلکاروں سمیت چار افراد شہید ہوگئے ہیں۔ دہشتگرد حملے میں شہید ہونے والے پولیس اہلکاروں میں ہیڈ کانسٹیبل امجد، ہیڈ کانسٹیبل جنید اور کانسٹیبل وقار شامل ہیں۔
پولیس کے مطابق حملے میں لکی مروت کا رہائشی ایک عام شہری بھی شہید ہوا جس کا نام نور محمد بتایا جا رہا ہے۔ واقعے کی اطلاع پر پولیس اور فوج کی بھاری نفری جائے وقوعہ پر پہنچ گئی ہے، علاقے کو گھیرے میں لیکر حملہ آوروں کی تلاش میں سرچ آپریشن شروع کردیا گیا ہے۔
واضح رہے کہ گزشتہ روز بنوں میں بھی انسداد پولیو ٹیم پر حملے کا واقعہ پیش آیا تھا جس میں 2 پولیس اہلکار شہید ہوگئے تھے۔
