اسلام آباد:جوڈیشل کمیشن آف پاکستان کا اجلاس چیف جسٹس یحییٰ آفریدی کے زیرصدارت ہوا، اجلاس میں 7 رکنی آئینی بنچ تشکیل دے دیا گیا جس کی سربراہی سپریم کورٹ کے جسٹس امین الدین خان کریں گے۔
جسٹس یحییٰ آفریدی کے چیف جسٹس پاکستان بننے کے بعد جوڈیشل کمیشن کا یہ پہلا اجلاس تھا جس میں 7 رکنی آئینی بینچ قائم کرنے کا فیصلہ کیا گیا۔
ذرائع کے مطابق جوڈیشل کمیشن میں آئینی بینچ کے قیام کا فیصلہ 7 اور 5 کے تناسب سے ہوا اور چیف جسٹس یحییٰ آفریدی، جسٹس منصور علی شاہ ، جسٹس منیب اختر ،عمر ایوب اور شبلی فراز نے جسٹس امین الدین خان کی سربراہی میں بینچ بنانے کی مخالفت کی جب کہ باقی ممبران نے حمایت میں ووٹ دیا۔
آئینی بینچ کے لیے پنجاب سے جسٹس امین الدین، جسٹس عائشہ ملک جب کہ سندھ سے جسٹس محمد علی مظہر اور جسٹس حسن اظہر رضوی لیے گئے ہیں۔
اسی طرح بلوچستان سے جسٹس جمال مندوخیل اورجسٹس نعیم اختر افغان جب کہ خیبرپختونخوا سے جسٹس مسرت ہلالی کو آئینی بینچ میں شامل کیا گیا ہے۔
