نوشہرہ میں دارالعلوم حقانیہ اکوڑہ خٹک کی جامع مسجد میں گزشتہ روز نمازِ جمعہ کے فوری بعد خود کش دھماکے کا مقدمہ درج کر لیا گیا ۔
دارالعلوم حقانیہ نوشہرہ میں خود کش حملے کا مقدمہ مولانا حامد الحق حقانی کے بیٹے عبدالحق ثانی کی مدعیت میں سی ٹی ڈی مردان میں نامعلوم ملزمان کے خلاف درج کیا گیا ۔
مقدمے میں انسداد دہشت گردی، قتل سمیت دیگر دفعات شامل کی گئی ہیں، سی ٹی ڈی کی جانب سے خودکش بمبار کی شناخت میں عوام سے مدد کی اپیل کی گئی ہے، اطلاع دینے والے کے لیے 5 لاکھ روپے انعام کا اعلان بھی کیا گیا ہے ۔
ایل آر ایچ اور نوشہرہ کے ہسپتال انتظامیہ کا کہنا ہے کہ دھماکے میں مولانا حامد الحق سمیت 7 افراد جاں بحق ہوگئے ہیں جبکہ اس وقت 16 زخمی افراد لیڈی ریڈنگ سمیت مختلف ہسپتالوں میں زیر علاج ہیں ۔
واضح رہے کہ گزشتہ روز دارالعلوم حقانیہ اکوڑہ خٹک کی مسجد میں خودکش دھماکے میں مولانا سمیع الحق کے بیٹے مولانا حامد الحق سمیت سات افراد شہید ہوگئے، دھماکے میں 16 افراد بھی زخمی ہوئے ۔
