اسلام آباد: اسلام آباد میں ہفتہ وار بریفنگ کے دوران ترجمان دفتر خارجہ ممتاز زہرہ بلوچ نے کہا ہےکہ افغان سرزمین ہمارے خلاف استعمال ہورہی ہے, ڈیرہ اسماعیل خان حملے پر افغانستان ٹی ٹی پی کے خلاف کارروائی کرے اور اس جرم میں ملوث ٹی ٹی پی کے لوگوں کو پاکستان کےحوالے کرے۔
ترجمان دفتر خارجہ نے کہا کہ پاکستان نے ڈی آئی خان حملے کے ثبوت افغان حکام کے حوالے کر دئیے ہیں، افغانستان نے ڈیرہ اسماعیل خان حملے کی تحقیقات کا اعلان کیا ہے، افغانستان اس کی آزادانہ اور شفاف تحقیقات کرے۔
ترجمان کا مزید کہنا تھا کہ پاکستان ایک عرصے سے دہشتگردی کا شکار ہے، ہماری سکیورٹی فورسز دہشتگردوں کا نشانہ بن رہی ہیں، ٹی ٹی پی سمیت دہشتگردوں کی محفوظ پناہ گاہیں افغانستان میں ہیں، افغان سرزمین پاکستان کے خلاف استعمال ہورہی ہے لہٰذا افغان عبوری حکومت دہشتگرد گروپوں کے خلاف کارروائی کرے ۔ انکا کہنا تھا کہ پاکستان نے ہمشہ کہا ہے ہم افغانستان کے ساتھ مثبت اور دوستانہ تعلقات چاہتے ہیں، ہم انسانی بنیادوں پر افغانستان میں اپنے بھائیوں کی مدد کو ہمشہ تیار رہے۔
ممتاز زہرہ نے کہا کہ پاکستان ٹی ٹی پی کے ساتھ مذاکرات کی خبروں کی تردید کرتا ہے، ٹی ٹی پی کے ساتھ پاکستان کوئی مذاکرات نہیں کررہا۔
