افغانستان کو پاکستان کے ساتھ تنازع مہنگا پڑگیا، افغان خشک میوہ جات کی برآمد گر گئی۔
تفصیلات کے مطابق افغانستان کے خشک میوہ جات برآمد کرنے والے افغان تاجر مشکلات کا شکار ہوگئے۔ تاجروں کا کہنا ہے کہ اسٹوریج کی مناسب سہولتیں نہ ہونے کے سبب خشک میوہ جات کو نقصان پہنچ رہا ہے۔
میڈیا رپورٹس کے مطابق افغانستان کے شمالی صوبے تخار میں خشک میوہ جات کے تاجروں نے کہا ہے کہ صوبے سے خشک میوہ جات کی برآمدات میں نمایاں کمی واقع ہوئی ہے۔ تاجروں کے مطابق اِن چیلنجز میں قابل عمل مقامی مارکیٹ کا فقدان، ناقص ذخیرہ اندوزی اور رکی ہوئی برآمدات شامل ہیں۔
رپورٹ کے مطابق تخار میں بادام، اخروٹ اور خوبانی جیسے کئی قسم کے خشک میوہ جات پیدا ہوتے ہیں۔ یہ پھل مقامی ضروریات کو پورا کرتے ہیں اور برآمد بھی ہوتے ہیں۔ تاہم، کچھ قسم کے خشک میوہ جات اب مقامی طور پر فروخت یا برآمد نہیں کیے جا رہے ہیں۔
ایک تاجر نے بتایا کہ پہلے اخروٹ اور خشک خوبانی جیسے پھل برآمد کیے جاتے تھے لیکن اب وہ انہیں فروخت نہیں کر سکتے ہم نے انہیں خریدا، لیکن اب وہ ہمارے پاس ہی رہ گئے ہیں۔
رپورٹ کے مطابق برآمد کے لیے خریدے گئے کچھ خشک میوہ جات مناسب ذخیرہ یا نقل و حمل کے اختیارات نہ ہونے کے باعث سڑ رہے ہیں۔ فروخت کنندگان نے نگراں حکومت سے برآمدات میں سہولت فراہم کرنے کا مطالبہ کیا ہے۔
