اے ٹی سی راولپنڈی نے عوامی مسلم لیگ کے رہنما شیخ رشید کی ضمانت منظور کرلی ہے
انسداد دہشت گردی کی راولپنڈی کی عدالت نے سربراہ عوامی مسلم لیگ شیخ رشید کے خلاف 9مئی کے مقدمے میں درخواست ضمانت کی سماعت کی۔ کیس کی سماعت کے دوران شیخ رشید کے وکلا عدالت میں پیش ہوئے تاہم پراسیکیوشن کی جانب سے کوئی پیش نہیں ہوا جس پر عدالت نے برہمی کا اظہار کیا۔ عدالت نے شیخ رشید کی درخواست ضمانت منظور کرتے ہوئے شیخ رشید کو 2لاکھ روپے کے ضمانتی مچلکے جمع کروانے کی ہدایت کردی۔عدالت نے حکم دیا کہ اگر شیخ رشید کسی اور مقدمے میں مطلوب نہیں تو انہیں رہا کیا جائے۔
دوسری جانب راولپنڈی کی انسداد دہشتگردی عدالت نے 9مئی کے تناظر میں درج 12 مقدمات میں بانی پی ٹی آئی اور شاہ محمود قریشی کی ضمانتیں بھی منظور کر لیں۔انسداد دہشتگردی عدالت کے جج ملک اعجاز آصف نے ضمانت کی درخواستوں پر سماعت کی۔پی ٹی آئی کے وکیل شیراز احمد رانجھا عدالت میں پیش ہوئے۔سماعت کے موقع پر پراسیکیوشن کی جانب سے مہلت کی استدعا مسترد کردی گئی۔بعدازاں عدالت نے تمام 12مقدمات میں بانی پی ٹی آئی اور شاہ محمود قریشی کی ضمانتیں منظور کرنے کا حکم سنا دیا۔یاد رہے کہ بانی پی ٹی آئی اس وقت سائفر، توشہ خانہ اور عدت میں نکاح کیس میں سزا پانے کے بعد راولپنڈی کی اڈیالہ جیل میں قید ہیں۔