قومی ویمن کرکٹرز بسمہ معروف اور غلام فاطمہ کار حادثےکا شکار ہو گئی ہیں
کراچی میں جاری قومی ویمن کرکٹ ٹیم کے تربیتی کیمپ میں شریک دو پلیئرز غلام فاطمہ اور بسمہ معروف کار حادثے میں زخمی ہوگئیں۔دونوں پلیئرز کو پاکستان کرکٹ بورڈ (پی سی بی) کے مطابق ابتدائی طبی امداد فراہم کر دی گئی ہے اور اب خطرے کی کوئی بات نہیں ہے۔پی سی بی حکام کے مطابق کراچی میں جاری کیمپ کا دونوں پلیئرز حصہ ہیں اور انہیں جمعے کی شب کار حادثے میں معمولی چوٹیں آئیں جس کے بعد ان کو ابتدائی طبی امداد فراہم کردی گئی۔
اعلامیہ کے مطابق دونوں پلیئرز جمعے کی شب کراچی میں مقیم ایک ساتھی کرکٹرز کے ساتھ چائے پینے کی غرض سے ہوٹل سے نکلی تھیں کہ یوٹرن لیتے ہوئے گاڑی فٹ پاتھ سے جا ٹکرائی، دیگر پلیئرز حادثے میں محفوظ رہیں تھیں۔ذرائع کے مطابق بسمہ اور غلام فاطمہ کی انجری بھی بہت معمولی نوعیت کی تھی،مقامی اسپتال میں دونوں پلیئرز کے احتیاطی ٹیسٹ بھی ہوئے ہیں اور پی سی بی کا میڈیکل پینل بھی ان کی دیکھ بھال کر رہا ہے۔