اسلام آباد: الیکشن کمیشن نے عوامی نیشنل پارٹی کو لالٹین کا نشان دے دیا تاہم ساتھ ہی جرمانہ بھی عائد کر دیا۔ الیکشن کمیشن نے عوامی نیشنل پارٹی کے انٹرا پارٹی الیکشن سے متعلق محفوظ فیصلہ سنا دیا۔ فیصلے کے مطابق اے این پی کو اس کا پرانا انتخابی نشان لالٹین الاٹ کردیا گیا ہے۔ الیکشن کمیشن نے عوامی نیشنل پارٹی پر 20 ہزار روپے کا جرمانہ بھی عائد کیا۔
عوامی نیشنل پارٹی نے انٹرا پارٹی الیکشن کے لیے 6 ماہ کی مہلت مانگی تھی جس پر الیکشن کمیشن نے کہا کہ اے این پی کی 5 سال کی مدت ابھی مکمل نہیں ہوئی ہے، ملک میں اس وقت الیکشن مہم چل رہی ہے اور سیاسی جماعتیں اس میں شرکت کررہی ہیں لہٰذا اے این پی 10 مئی تک انٹرا پارٹی الیکشن کرائے۔
