پشاور: خیبرپختونخوا میں پولیس افسران و اہلکاروں کے سوشل میڈیا ایپس کے استعمال پر پابندی عائد کردی گئی ۔
اس حوالے سے سینٹرل پولیس آفس پشاور نے ریجنل اور ضلعی پولیس افسران کو پولیس افسران و اہلکاران کو سوشل میڈیا استعمال سے روکنے کیلئے خط ارسال کردیا ۔
سنٹرل پولیس آفس کی طرف سے جاری خط میں تمام رینک کے پولیس افسران و اہلکاروں کو ٹک ٹاک، فیس بک، انسٹاگرام، وٹس ایپ اور یوٹیوب سمیت سوشل میڈیا پلیٹ فارمز کے استعمال سے روکنے کے احکامات جاری کئے گئے ہیں۔
خط میں ہدایت کی گئی ہے کہ پولیس اہلکار و افسران ایس او پیز پر سختی سے عملدرآمد کریں، سوشل میڈیا پر ذاتی اکانٹس ہولڈر کی ڈی پی پر باوردی فوٹو، اسلحہ، پولیس بیج یا دیگر شواہد اپلوڈ کرنے پر بھی مکمل پابندی ہوگی۔
خط کے مطابق بیشتر پولیس اہلکار ایس او پیز کی خلاف ورزی کرتے ہوئے پائے گئے ہیں،جن کے خلاف آر پی او اور ڈی پی اوز کو محکمانہ کارروائیاں کرنے کے احکامات جاری کئے گئے ہیں۔
