لاہور: چیئرمین پاکستان پیپلزپارٹی بلاول بھٹو زرداری نے بلوچستان اور خیبرپختونخوا کے امن و امان کی صورتحال پر اظہار تشويش کرتے ہوئے قومی معاملات پر اتفاق رائے پیدا کرنے کو ناگزیر قرار دے دیا ہے ۔
گورنر ہاؤس لاہور میں تقریب سے خطاب کرتے ہوئے بلاول بھٹو نے کہا کہ پوری قوم اور تمام جماعتوں کو دہشت گردوں سے مقابلے کیلیے متحد ہونا ہوگا ۔
انہوں نے کہا کہ تمام جماعتوں کو ملک و قوم کیلیے ایک جگہ پر جمع ہونا ہوگا، اپوزیشن کو سیاست کرنی ہے تو وہ عوامی ایشوز پر بات کرے کیونکہ اب وقت ہے کہ ملکی مفادات کیلیے اجتماعی فیصلے کیے جائیں ۔
چیئمرین پیپلز پارٹی کا کہنا تھا کہ تمام سیاسی جماعتوں کو بلوچستان اور خیبرپختونخوا پر خصوصی توجہ دینے کی ضرورت ہے ۔
انہوں نے مزید کہا کہ کچھ جماعتوں نے قومی سلامتی کمیٹی کے اجلاس میں شرکت نہیں کی، حکومت کو دوبارہ قومی سلامتی کمیٹی کا اجلاس بلا کر شرکت نہ کرنے والی جماعتوں کو قائل کرنا چاہیے ، تاکہ تمام قومی معاملات پر اتفاق رائے پیدا کیا جا سکے ۔
