مسلح افواج کے خلاف الزامات پر بانی پی ٹی آئی عمران خان کی ہمشیرہ نورین نیازی کے خلاف پیکا ایکٹ کے تحت مقدمہ درج کر لیا گیا، نورین نیازی کے خلاف مقدمے کا اندراج پیکا ایکٹ کی سیکشن 20 اور 26 اے کے تحت کیا گیا ہے ۔
نورین نیازی نے ایک انٹرویو میں پاکستان کی ریاست اور اس کے اداروں، بشمول مسلح افواجکے خلاف مبینہ طور پر جھوٹے اور بے بنیاد الزامات عائد کیے اور ریاست پر عوام کا اعتماد متزلزل کرنے اور سراسیمگی پھیلانے کی کوشش کی ۔
مقدمے کے متن میں کہا گیا ہے کہ ایف آئی آر کے متن کے مطابق نورین نیازی نے جھوٹا، اشتعال انگیز، توہین آمیز اور دھمکی آمیز مواد پھیلایا، نورین نیازی نے ریاستی اور سکیورٹی اداروں کے خلاف منظم پروپیگنڈا کیا ۔
ایف آئی آر میں مزید کہا گیا ہے کہ متنازعہ انٹرویو سوشل میڈیا پلیٹ فارم ایکس کے مختلف اکاؤنٹس پر شیئر ہونے کے بعد وائرل ہوا، الزام عائد کیا گیا ہے کہ نورین نیازی نے معرکۂ حق کے دوران افواجِ پاکستان کی کامیابیوں کو جھٹلانے اور جھوٹا بیانیہ پھیلا کر عوام میں ریاستی اداروں کے خلاف نفرت، خوف اور بداعتمادی پیدا کرنے کی کوشش کی ۔
