صدر مملکت آصف علی زرداری اور وزیراعظم شہباز شریف نے اولمپکس میں گولڈ میڈل جیتنے پر پاکستانی ایتھلیٹ ارشد ندیم کو مبارکباد دی ہے۔
صدرآصف زرداری کا کہنا تھا کہ ارشد ندیم کی جیت پوری قوم کی جیت ہے۔
انہوں نے کہا کہ ارشد ندیم آپ پوری قوم کا فخر ہیں، فائنل میں شاندار اولمپکس ریکارڈ قائم کرنا، طویل ترین جیولین تھرو کرنا بڑا کارنامہ ہے، پیرس اولمپکس میں پاکستان کے لیے تمغہ جیت کر آپ نے ہمارا سر فخر سے بلند کر دیا۔
وزیراعظم شہباز شریف نے کہا کہ اولمپکس جیولن چیمپئن ارشد ندیم نے پیرس اولمپکس میں گولڈ میڈل جیت کر تاریخی کامیابی حاصل کی۔
سماجی رابطے کی ویب سائٹ پر وزیراعظم کا کہنا تھا کہ آپ نے پوری قوم کا سر فخر سے بلند کر دیا ہے۔
پاکستان مسلح افواج کے سربراہان نے پیرس اولمپکس میں تاریخ رقم کرنے اور گولڈ میڈل حاصل کرنے پر ارشد ندیم کو مبارکباد دی۔
آئی ایس پی آر کے مطابق مسلح افواج کے سربراہان اور چیئرمین جوائنٹ چیف آف اسٹاف کمیٹی نے اپنے پیغامات میں شاندار کامیابی پر ارشد ندیم کو مبارکباد پیش کی ہے۔
آئی ایس پی آر کے مطابق مسلح افواج کے سربراہان اور چیئرمین جوائنٹ چیف آف اسٹاف کمیٹی کا کہنا تھا کہ ارشد ندیم نے گولڈ میڈل جیت کر تاریخ رقم کر دی ہے، پاکستان کے لیے شاندار کامیابی پر ارشد ندیم کی لگن کا ثبوت ہے۔
