صدر مملکت آصف علی زرداری اور وزیراعظم شہباز شریف نے قوم کو عیدالفطر کی مبارکباد دی ہے اور کہا ہے کہ عید کا دن ہمیں اتحاد اور یکجہتی کا درس دیتا ہے، ہمیں ہرقسم کی انتہاپسندی، نفرت اور فرقہ واریت سے بچنا ہوگا ۔
اسلام آباد: عیدالفظر کے حوالے اپنے پیغام میں صدر مملکت آصف علی زرداری نے کہا ہے کہ عید کا دن ہمیں اتحاد اور یکجہتی کا درس دیتا ہے، ضرورت مندوں کی مدد کیلئے زکٰوۃ،صدقات، فطرانہ بڑھ چڑھ کرادا کریں ۔
صدر مملکت نے کہا ہے کہ اصل خوشی دوسروں کے ساتھ اپنے خوشیاں بانٹنے میں ہے، ہمیں چاہیے کہ رمضان کی برکتوں کو اپنی روزمرہ کی زندگی میں نافذ کریں ۔
انہوں نے کہا کہ رمضان المبارک ہمیں صبر،عبادت،غریبوں کی مدد کا درس دیتا ہے، عیدالفطر اللہ تعالیٰ کا انعام ہے جو روزے کی مشقت پر عطاکیاگیا ۔
دوسری جانب وزیراعظم شہباز شریف نے بھی پوری قوم کو دل کی گہرائیوں سے عیدالفطر کی مبارکباد دیتے ہوئے کہا ہے کہ عید الفطر کا دن ہمیں خوشی،شکرگزاری،اخوت اور ہمدردی کا درس دیتا ہے ۔
انہوں نے کہا کہ آج پاکستان کو اندرونی اور بیرونی دشمنوں سےخطرات لاحق ہیں، ہمیں ہرقسم کی انتہاپسندی،نفرت اور فرقہ واریت سے بچنا ہوگا اور ملک کی سالمیت اور استحکام کیلئے متحد ہونا ہوگا ۔
وزیراعظم شہبازشریف کا کہنا تھا کہ حکومت ملکی معیشت کے استحکام کیلئے بھرپور کوشش کررہی ہے، ہمیں متحد ہوکر اپنے ملک کو ترقی اور خوشحالی کی راہ پر گامزن کرناہے اور متحد ہوکروطن عزیز کے خلاف سازشوں کو ناکام بنانا ہے ۔
