پشاور: بین الاقوامی جعلی ڈرائیونگ لائسنس کے سکینڈل کی تحقیقات کے لیے خیبرپختونخوا حکومت نے وفاقی تحقیقاتی ادارے کو خط لکھ دیا۔
ایف آئی اے کو لکھے گئے خط میں خیبرپختونخوا حکومت نے کہا ہے کہ مبینہ طور پر جعلی ویب سائٹس لائسنسز کی تصدیق کررہی ہیں۔
خط میں ایف آئی اے سائبرکرائم ونگ کو کہا گیا ہے کہ وہ جعلی ویب سائٹس کی بھی تحقیقات کرے۔
خیبرپختونخوا حکومت کی جانب سے اعلامیے میں بتایاگیا ہےکہ جعلی ڈرائیونگ لائسنس سکینڈل کی تحقیقات کےلیے صوبائی سطح پر بھی تحقیقاتی کمیٹی قائم کی گئی ہے ۔
کمیٹی میں ایڈیشنل آئی جی سپشل برانچ، سیکرٹری قانون اور ایم ڈی آئی ٹی بورڈ شامل ہیں۔
کمیٹی ایک ماہ کے اندر تحقیقات کرکے رپورٹ صوبائی حکومت کو پیش کرے گی۔
واضح رہے کہ ہانگ کانگ اور آسٹریلیا سے متعددجعلی لائسنس کی تصدیق کی شکایات سامنے آئی تھیں جس پر محکمہ ٹرانسپورٹ خیبرپختونخوا کی تحقیقات کی تھیں۔
تحقیقات کے بعد ہانگ کانگ سے بھیجےگئے 90 ڈرائیونگ لائسنس میں سے 85 جعلی نکلے تھے اور صرف 5 ڈرائیونگ لائسنس اصل قرار دیے گئے تھے۔
