لاہور: وزیر اعظم شہباز شریف نے کہا ہے کہ مولانا فضل الرحمان کو مدارس بل پر اعتماد میں لیا جائے گا۔ وزیر اعظم شہباز شریف نے لاہور میں پارٹی صدر نواز شریف سے اہم ملاقات کی۔ نواز شریف نے وزیر اعظم کو ملکی معاشی صورتحال میں بہتری خصوصا اسٹاک ایکسچنج میں نیا ریکارڈ بنانے پر مبارکباد دی۔
شہباز شریف نے نواز شریف کو ایس آئی ایف سی کے تناظر میں بیرونی سرمایہ کاری میں پیشرفت سے آگاہ کیا۔ ملاقات میں ملک کی مجموعی سیاسی صورتحال پر تبادلہ خیال کیا گیا۔
ذرائع کے مطابق ملاقات میں 26 نومبر کے واقعات اور سول نافرمانی کی کال پر بھی تبادلہ خیال ہوا۔ نواز شریف اور وزیر اعظم کے درمیان ملکی سلامتی اور قومی یکجہتی کو نقصان پہنچانے والوں کا محاسبہ کرنے پر اتفاق کیا گیا۔
نواز شریف نے کہا کہ ملکی ترقی کی راہ میں کسی کو رکاوٹ ڈالنے کی اجازت نہیں دے جائے گی۔ مدارس بل پر مولانا فضل الرحمان کے تحفظات دور کیے جائیں۔ وزیر اعظم نے کہا کہ مولانا فضل الرحمان کو مدارس بل پر بھی اعتماد میں لیا جائے گا۔
دونوں رہنماؤں کے درمیان ملکی معاملات پر حکومتی اتحادیوں سے مشاورت اعتماد میں لینے پر اتفاق کیا گیا۔ وزیر اعظم نے پارٹی قائد کو سعودی عرب سمیت دیگر ممالک کی پاکستان میں سرمایہ کاری کے لیے دلچسپی سے بھی آگاہ کیا۔
