وزیر مملکت برائے خزانہ بلال اظہر کیانی نے ٹیکس فراڈ کے مقدمات میں گرفتاریوں سے متعلق واضح کیا ہے کہ گرفتاری صرف مخصوص کیسز میں ہی ممکن ہوگی۔ قومی اسمبلی کے اجلاس میں اظہارِ خیال کرتے ہوئے انہوں نے کہا کہ ٹیکس فراڈ کے معاملے میں ایف بی آر کے ممبر کی سربراہی میں تین رکنی کمیٹی فیصلہ کرے گی کہ کن کیسز میں گرفتاری ضروری ہے۔
انہوں نے مزید کہا کہ ابتدائی انکوائری کے دوران کسی کو گرفتار نہیں کیا جائے گا۔ بلال اظہر کیانی نے اس بات پر زور دیا کہ ایف بی آر کو پہلے سے ہی ٹیکس فراڈ کے کیسز میں گرفتاری کا اختیار حاصل ہے، لیکن اب اس اختیار کو ذمہ داری سے استعمال کیا جائے گا۔
وزیر مملکت کا کہنا تھا کہ وزیراعظم نے تاجر برادری کی گرفتاری سے متعلق تجویز کا نوٹس لیا ہے اور شہریوں کے تحفظ کے لیے خصوصی اقدامات کی ہدایت دی ہے۔
