بلوچستان : فرنٹیئر کور (ایف سی) بلوچستان نے 20 دسمبر کو خاران شہر میں ایک اہم انٹیلیجنس بیسڈ آپریشن میں بڑی کامیابی حاصل کی، جس کے نتیجے میں دہشتگردوں کے ناپاک عزائم ناکام بنا دیے گئے۔ اس آپریشن کے دوران ایف سی بلوچستان نے ایک آئی ای ڈی بنانے والی فیکٹری پر قبضہ کر لیا، جس میں دھماکہ خیز مواد تیار کیا جاتا تھا۔
آپریشن کے دوران، ایف سی کو موٹرسائیکل میں نصب 30 کلوگرام دھماکہ خیز مواد بھی برآمد ہوا، جو دہشت گردوں کی جانب سے خاران میں کسی دہشت گردانہ کارروائی کے لیے استعمال کیا جانا تھا۔ دہشت گردوں نے یہ مواد ایک موٹرسائیکل میں نصب کر رکھا تھا تاکہ شہر میں بڑے پیمانے پر تباہی مچائی جا سکے۔
فائرنگ کے تبادلے میں دو خارجی زخمی ہوئے، اور ان کے زیر استعمال اسلحہ اور دیگر تخریبی سامان بھی قبضے میں لے لیا گیا۔ اس کامیاب کارروائی کے ذریعے ایف سی بلوچستان نے نہ صرف خاران بلکہ پورے بلوچستان کو بڑے نقصان سے بچا لیا۔
ایف سی بلوچستان کی بروقت کارروائی نے دہشت گردوں اور ان کے سہولت کاروں کے عزائم کو خاک میں ملا دیا۔ ایف سی کے ترجمان نے اس کامیابی کی تصدیق کرتے ہوئے کہا کہ بلوچستان کے امن کو سبوتاژ کرنے کی ہر کوشش ناکام بنائی جائے گی اور خارجیوں کو اپنے مذموم مقاصد میں کامیاب نہیں ہونے دیا جائے گا۔
یہ آپریشن اس بات کا غماز ہے کہ ایف سی بلوچستان دہشت گردوں کے ناپاک عزائم کو ناکام بنانے کے لیے اپنی تمام تر توانائیاں صرف کر رہی ہے، اور بلوچستان کے امن کو درپیش خطرات کے باوجود علاقے میں امن قائم رکھنے کے لیے ہر ممکن اقدام اٹھا رہی ہے۔
