ضلع ٹانک کی گل امام چوکی پر نامعلوم افراد کی جانب سے فائرنگ کا واقعہ پیش آیا جس کے نتیجے میں پانچ پولیس اہلکار زخمی ہوگئے۔ ذرائع کے مطابق، حملہ آوروں نے چھوٹے اور بڑے ہتھیاروں سے پولیس چوکی پر فائرنگ کی، جس سے پانچ اہلکار شدید زخمی ہوگئے۔
فوری طور پر ریسکیو 1122 کی ٹیم نے زخمیوں کو طبی امداد کے لئے ڈی ایچ کیو ہسپتال منتقل کر دیا۔ ہسپتال ذرائع کا کہنا ہے کہ زخمی اہلکاروں کی حالت اب خطرے سے باہر ہے۔
پولیس نے واقعے کے بعد علاقے کو گھیرے میں لے کر سرچ آپریشن شروع کر دیا ہے۔ پولیس اور سیکیورٹی فورسز کے اہلکاروں کو موقع پر روانہ کر دیا گیا ہے تاکہ واقعے کی تفصیلات معلوم کی جا سکیں اور تحقیقات کا آغاز کیا جا سکے۔
