پارا چنار میں غیر قانونی بنکرز کو تباہ کرنے کا سلسلہ جاری ہے۔ آج مزید 4 بنکرز اڑا دیئے گئے۔
انتظامیہ کے مطابق تحصیل لوئر کرم کے علاقوں بالش خیل اور خار کلی میں مزید چار بنکرز اڑا دئیے گئے ہیں، لوئر کرم علی زئی اور ٹالوکنج اور بادشاہ کوٹ میں بھی بنکرز مسماری کا کام شروع کیا جا رہا ہے۔ بنکرز خالی کرنے اور مسماری کے بعد ان مقامات میں پولیس و فورسز کی نفری تعینات کی جا رہی یے۔
دوسری جانب علاقے میں اشیائے خوردونوش کی قلت سے عوام سخت پریشانی کا شکار ہیں اورآٹے گھی کی تلاش اور خریداری میں مارے مارے پھر رہے ہیں۔ تاجر رہنما حاجی رؤف کا کہنا ہے کہ ٹل ہنگو میں کھڑی گاڑیوں و ٹینکرز کیلئے آج بھی کوششیں جاری ہیں، عوام نے حکام سے پرزور مطالبہ کیا کہ آٹا، چینی اور گھی کی زیادہ سے زیادہ گاڑیاں لائی جائیں۔
تاجر برادری کا کہنا ہے کہ پٹرول ڈیزل بھی ختم ہوگیا ہے، ادویات کی بھی شدید قلت ہے، ڈی سی کرم کا کہنا ہے کہ اپر کرم کے عوام کی ضروریات کو پورا کرنے کے لیے متعدد اقدامات کئے جارہے ہیں۔
