اشیائے خورونوش، ادویات لے کر 70 گاڑیوں کا قافلہ ضلع کرم پہنچ گیا۔ سبزی،پھل، ادویات،چینی،آٹا،گھی سمیت دیگر خوردنی اور روزمرہ استعمال کی اشیاء لے کر 70گاڑیاں پاراچنار پہنچیں۔ ایک روز کے وقفے کے بعد دوسرا قافلہ پہنچنے کے بعد اشیاء کے نرخوں میں کمی آنا شروع ہوگئی ہے۔
شہریوں کا کہنا کہ پیٹرول ڈیزل کی سپلائی بحال نہیں ہوئی جس کے باعث شہری اپنے اپنے علاقوں میں محصور ہیں اور مریضوں کو اسپتال تک پہنچانےمیں بھی مشکلات کا سامنا ہے۔
اسسٹنٹ کمشنر افراسیاب زبیر ہندل کا کہنا ہے کہ راستےکھولنے سمیت امن معاہدے کی تمام شقوں پر عمل کرنے کے لیے اقدامات جاری ہیں۔
مشیرِ صحت احتشام علی کے مطابق زمینی رابطہ بحال ہونے تک ہیلی کاپٹر کے ذریعے ادویات بھیجی جائیں گی۔ دوسری جانب کرم میں آج سے بنکرز گرانے کا کام دوبارہ شروع ہونے کا امکان ہے جبکہ امن معاہدے کے دستخط کنندگان اور امن کمیٹیوں کے اراکین کے ساتھ جرگہ بھی تین روز میں متوقع ہے جس میں اسلحہ جمع کرنے کے طریقۂ کار کے معاملات طے کیے جائیں گے۔
