جنوبی وزیرستان میں دہشت گردوں کے حملے میں شہید ہونے والے جوانوں کی نماز جنازہ ادا کر دی گئی ۔
پاک فوج کے شعبہ تعلقات عامہ کے مطابق گزشتہ روز خیبرپختونخوا کے ضلع جنوبی وزیرستان کے علاقے مکین میں دہشت گردوں کے ساتھ فائرنگ کے تبادلے کے دوران شہید ہونے والے اہلکاروں کی نماز جنازہ بنوں کینٹ میں ادا کی گئی ۔
آئی ایس پی آر نے مزید کہا ہے کہ شہداء میں شامل جمرود کے رہائشی سول کیمرہ ٹیکنیشن وقاص احمد شہید کی نماز جنازہ بھی ادا کی گئی ۔
شہدا کی نماز جنازہ میں کور کمانڈر پشاور، پاک فوج کے سینئر افسران، جوانوں اور عمائدین علاقہ کی بڑی تعداد نے شرکت کی ۔
پاک فوج کے شعبہ تعلقات عامہ کا کہنا ہے کہ ہمارے شہداء کی یہ قربانیاں دہشت گردی کے خلاف جاری جنگ میں ہمارے عزم و حوصلے کو دوام بخشتی ہیں ۔
واضح رہے کہ گزشتہ روز جنوبی وزیرستان چیک پوسٹ پر خوارج کے حملے کی کوشش میں 16 جوان وطن پر قربان ہوگئے تھے جبکہ شدید فائرنگ کے تبادلے میں 8 دہشت گرد بھی مارے گئے تھے ۔
