اسلام آباد(ارشد اقبال) خیبرپختونخوا کے گورنر فیصل کریم کنڈی نے خیبر نیوز کے پروگرام ”کے پی آور“ میں میزبان جمشید علی خان کو خصوصی انٹرویو دیتے ہوئے کہا کہ خیبر نیٹ ورک دنیا بھر میں پختونوں کے لیے اپنی خدمات بہترین انداز میں سرانجام دے رہا ہے۔
گورنر خیبرپختونخوا کا کہنا تھا کہ خیبر نیٹ ورک بہترین اچھا کام کر رہا ہے، پشتون چاہے پاکستان میں ہوں یا بیرون ملک مقیم ہوں، خیبر نیٹ ورک نے انہیں اپنی زبان میں تازہ ترین صورتحال سے آگاہ کرنے کا موقع فراہم کیا ہے۔
فیصل کریم کنڈی نے کہا کہ میں نے پہلے بھی کہا تھا کہ یہ مقابلے کا دور ہے، اس دور میں جو بھی مقابلے میں شامل ہوگا اور اچھا کام کرے گا وہ آگے بڑھے گا۔
گورنر خیبرپختونخوا کا کہنا تھا کہ ایسا نہیں ہے کہ خیبر ٹی وی صرف ایک چینل ہے، خیبرنیٹ ورک میں اپنے فرائض سرانجام دینے والے پختونوں کا کام بہت اہم ہے۔
گورنر فیصل کریم کنڈی نے کہا کہ میں پہلے بھی کہہ چکا ہوں کہ ہر دور اور ہر جگہ بہتری کی گنجائش ہے، خیبر نیوز نے پختونوں کیلئے جس طرح اپنا کام جاری رکھا ہے اور اپنا بہترین کردار نبھا رہا ہے یہ کسی سے ڈھکا چھپا نہیں ۔
گورنر فیصل کریم کنڈی نے یہ بھی کہا کہ خیبر نیٹ ورک پختونوں کی خدمت کے حوالے سے اپنا اہم کام جاری رکھے گا۔
