پشاور میں ناصرباغ تھانے کی حدود میں چیک پوسٹ پر نامعلوم حملہ آوروں نے دستی بم پھینکا۔
تفصیلات کے مطابق حملہ آوروں نے چیک پوسٹ پر فائرنگ کی اور دستی بم پھینکے تاہم پولیس اہلکاروں کی جوابی کارروائی کے بعد نامعلوم حملہ آور فرار ہوگئے۔پولیس کے مطابق چوکی سے دو دستی بم برآمد ہوئے ہیں تاہم کوئی جانی نقصان نہیں ہوا۔
پولیس نے واقعے کی تحقیقات شروع کر دی ہیں اور حملہ آوروں کی شناخت کے لیے سی سی ٹی وی فوٹیج کا جائزہ لیا جا رہا ہے۔اس سے قبل لکی مروت پولیس نے اتوار کے روز رات گئے تھانے پر دہشت گردوں کے حملے کو پسپا کر دیا۔پولیس ذرائع کے مطابق جدید ترین اسلحے سے لیس دہشت گردوں نے تھانے پرحملہ کیا۔پولیس اہلکاروں کی بروقت جوابی کارروائی سے دہشت گرد جائے وقوعہ سے فرار ہونے پر مجبور ہو گئے۔ فائرنگ کے تبادلے میں کسی جانی نقصان کی اطلاع نہیں ملی۔
