جنوبی وزیرستان میں جشنِ آزادی اور معرکۂ حق کی تقریبات ملی جوش و جذبے کے ساتھ جاری ہیں۔ فرنٹیئر کور خیبر پختونخوا (ساؤتھ)، ضلعی انتظامیہ اور عوام کے باہمی تعاون سے یکم اگست سے 14 اگست تک رنگا رنگ پروگراموں کا انعقاد کیا گیا۔ ان تقریبات نے ہر شہر اور گاؤں کو حب الوطنی کی روشنی سے جگمگا دیا۔
جشن کا سب سے دلکش لمحہ 13 اور 14 اگست کی درمیانی شب وانا اور سراروغہ میں ہونے والی شاندار آتش بازی تھی۔ آسمان رنگ برنگی روشنیوں سے روشن ہوا اور فضا "اللہ اکبر” اور "پاکستان زندہ باد” کے نعروں سے گونج اٹھی۔ شہری بڑی تعداد میں اس منظر کو دیکھنے پہنچے اور اپنے وطن سے محبت کا والہانہ اظہار کیا۔
فرنٹیئر کور ساؤتھ کے زیرِ انتظام یکم سے 13 اگست تک اسپورٹس فیسٹیولز کا انعقاد وانا، مکین، سراروغہ، لدھا، خانکوٹ اور دیگر شہروں میں کیا گیا۔ فیسٹیولز میں 36 کرکٹ ٹیموں، 29 والی بال ٹیموں اور 48 فٹ بال ٹیموں نے شرکت کی، جبکہ مقابلے شاندار ماحول میں ہوئے۔ اسی دوران مختلف اسکولوں میں ملی نغموں، تقاریر اور ثقافتی پروگرامز پر مشتمل تقریبات بھی ہوئیں، جن میں طلبہ، اساتذہ اور والدین نے بڑھ چڑھ کر حصہ لیا۔
جنوبی وزیرستان کے مختلف شہروں میں پرچم کشائی کی پرجوش تقریبات کا بھی انعقاد کیا گیا۔ وانا، لدھا، دوسلی، شیرونگی، سرویکئی اور منزائی میں قومی پرچم لہرایا گیا۔ وانا میں ایف سی ساؤتھ ہیڈ کوارٹرز پر پرچم کشائی کے دوران چاک و چوبند دستے نے سلامی پیش کی۔ اس موقع پر افسران اور جوانوں کے ساتھ عوام کی بڑی تعداد نے شرکت کی، قومی ترانہ بجایا گیا اور وطن کی سلامتی کے لیے دعا کی گئی۔ حاضرین نے 14 اگست کی قربانیوں کو یاد کرتے ہوئے شہداء کو خراجِ تحسین پیش کیا۔ تقاریب کا اختتام "پاکستان زندہ باد” کے فلک شگاف نعروں کے ساتھ ہوا۔
اسی طرح شمالی وزیرستان میں بھی جشنِ آزادی اور معرکۂ حق کی رنگارنگ تقریبات جاری رہیں۔ یومِ آزادی کے موقع پر منعقدہ مرکزی تقریب میں مختلف کھیلوں کے مقابلے، ملی نغمے اور تقاریر شامل تھے۔ جی او سی میران شاہ، میجر جنرل عادل افتخار تقریب کے مہمانِ خصوصی تھے۔ ضلعی انتظامیہ، معززین، ملک و مشران اور عوام کی بڑی تعداد نے شرکت کی۔
فائنل میچ میں شائقین کی دلچسپی قابل دید تھی اور اپنی ٹیموں کے لیے بھرپور حوصلہ افزائی کی گئی۔ بچوں نے قومی پرچم تھامے ملی نغموں اور تقاریر کے ذریعے وطن سے اپنی محبت کا اظہار کیا۔ مہمان خصوصی نے بچوں میں انعامات تقسیم کیے اور ان کی محنت، لگن اور حب الوطنی کے جذبے کو سراہا۔ تقریب کے اختتام پر شاندار آتش بازی نے ماحول کو مزید پرجوش بنا دیا اور ہر طرف جشن کا سماں قائم ہوگیا۔
