لاہور: چیمپئنز ٹرافی میں شرکت سے بھارت کے انکار کے بعد پی سی بی نے بھی سخت مؤقف اپنانے کا فیصلہ کر لیا ہے۔ چیمپئنز ٹرافی کے لیے بھارت کے پاکستان نہ آنے کے معاملے پر پاکستان کرکٹ بورڈ نے قانونی مشاورت کی۔
ذرائع کے مطابق پاکستان کرکٹ بورڈ اگلے ایک دو روز میں آئی سی سی کو خط لکھے گا، آئی سی سی کو خط حکومتی رہنمائی میں لکھا جائے گا، بورڈ نے اس حوالے سے قانونی مشاورت بھی مکمل کر لی ہے۔ ذرائع کا بتانا ہے کہ پی سی بی آئی سی سی سے بھارت کے پاکستان نہ آنے کی ٹھوس وجوہات کا پوچھے گا، پی سی بی حکومتی تجویز کے مطابق سخت ترین جواب دے گا اور اپنا مؤقف پیش کرے گا۔
ذرائع کا کہنا ہے کہ بھارتی بورڈ نے آئی سی سی کو چیمپئینز ٹرافی کے لیے پاکستان نہ آنے کا بتایا، پی سی بی مطالبہ کرے گا کہ بھارتی بورڈ انکار کی وجہ لکھ کر دے، پاکستان کرکٹ بورڈ دیگر بورڈز سے بھی رابطے کر کے اپنا مؤقف سامنے رکھے گا۔ یاد رہے کہ آئی سی سی نے پی سی بی کو تحریری طور پر بھارتی فیصلے کا بتایا، آئی سی سی کے بتانے کے بعد پی سی بی نے حکومت سے رجوع کیا تھا۔
