آئی ایس پی آر کے مطابق سیکیورٹی فورسز نے باجوڑ میں پاک افغان سرحد پر دہشتگردوں کی دراندازی کی کوشش ناکام بنادی۔
آئی ایس پی آرنے کہا ہے کہ 18 اور 19 اگست کی درمیانی شب پاکستان اور افغانستان کی سرحد پر دہشتگردوں کے ایک گروپ کی نقل و حرکت نوٹ کی گئی، جو دراندازی کی کوشش کر رہے تھے۔
سیکیورٹی فورسز نے ان خوارج کو ضلع باجوڑ میں جا پکڑا ۔اس دوران فوری کارروائی کرتے ہوئے 5دہشتگردہلاک اور 4 زخمی ہوگئے۔
تاہم، شدید فائرنگ کے تبادلے کے دوران ضلع خیبر کے 36 سالہ نائیک عنایت خان، مانسہرہ کے 35 سالہ لانس نائیک عمر حیات اور پشاور کے رہائشی 25 سالہ سپاہی وقار خان نے بہادری سے لڑتے ہوئےجام شہادت نوش کیا ۔
آئی ایس پی آر کا کہنا ہے کہ پاکستان مستقل طور پر عبوری افغان حکومت سے کہتا رہا ہے کہ وہ سرحد کے اطراف میں موثر بارڈر مینجمنٹ کو یقینی بنائے۔ توقع ہے کہ عبوری افغان حکومت اپنی ذمہ داریاں پوری کرے گی اور خوارج کی جانب سے پاکستان کے خلاف دہشت گردی کی کارروائیوں کو جاری رکھنے کے لیے افغان سرزمین کے استعمال سے انکار کرے گی۔
آئی ایس پی آر نے کہا کہ پاکستان کی سیکیورٹی فورسز اپنی سرحدوں کی حفاظت کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
