اسلام آباد: وزیراعظم شہباز شریف نے رمضان المبارک سے قبل ملک میں مہنگائی مزید کم کرنے کی خوشخبری سنادی، کہتے ہیں مہنگائی سنگل ڈیجٹ پر آگئی ہے ، اب مزید کمی بھی آئے گی ۔
شہباز شریف نے صحافیوں سے گفتگو کرتے ہوئے کہا کہ ملکی معیشت کو ٹھیک کرنے کے لیے دن رات محنت کی ہے، مگر ابھی مزید محنت درکار ہے، آہستہ آہستہ عوام کو بہتر معیشت کے ثمرات مل رہے ہیں ۔
انہوں نے کہا کہ جب ملک کی باگ ڈور سنبھالی تو حالات انتہائی مشکل تھے،ہم نے حکومت کی بہتری کے لیے اقدامات کیے اور سفارشی کلچر کو ختم کرنے کی کوشش کی ۔
وزیراعظم شہباز شریف کا کہنا تھا کہ سیاسی جھگڑوں سے نفرت پھیلتی ہے، جو ملک کے لیے نقصان دہ ہے ،پی ٹی آئی کے دور میں نفرت کا کلچر پروان چڑھا، جس نے ملک کو نقصان پہنچایا۔ باہمی اتفاق و اتحاد سے ہی ملک کو ترقی دی جا سکتی ہے ۔
انہوں نے کہا کہ ملک میں مہنگائی کی شرح سنگل ڈیجیٹ پر آ گئی ہے، بینکوں کا مارک اَپ ریٹ بہتر ہوا ہے ، آنے والے دنوں میں مہنگائی کا گراف مزید کم ہو گا ، اس کامیابی میں پوری ٹیم کی کاوش شامل ہے ۔
شہباز شریف کا کہنا تھا کہ سرکاری افسران کو بھی دن رات محنت کرنا ہوگی ، ملک کی ترقی کے لیے ہر سٹیک ہولڈر کو خلوص نیت سے کام کرنا ہو گا ، فوج ملکی سلامتی کے لیے جانوں کی قربانیاں دے رہی ہے ۔
