ایران کی جانب سے اسرائیل پر حملوں کا سلسلہ شدت اختیار کرگیا ہے۔ 18ویں لہر کے دوسرے مرحلے میں ایران نے صبح سویرے اسرائیل پر میزائلوں کی بارش کردی، جس کے نتیجے میں پورے اسرائیل میں خطرے کے سائرن بجنے لگے۔ جبکہ جوابی کارروائی میں اسرائیل نے ایران کی اصفہان میں ایک جوہری تنصیب اور میزائلوں پر بم برسا دئے۔
ایران اور اسرائیل کے درمیان جاری جنگ کے نویں روز اسرائیلی فوج نے ایران میں میزائل ذخیرہ گاہوں اور لانچنگ سائٹس پر نئی فضائی کارروائیاں کیں۔ اسرائیلی فوج نے سوشل میڈیا پلیٹ فارم ”ایکس“ پر جاری بیان میں کہا، ’فضائیہ نے اب ایران کے وسطی علاقے میں میزائل ذخیرہ کرنے اور لانچ کرنے والی تنصیبات پر حملوں کی ایک نئی لہر کا آغاز کیا ہے۔‘
ایرانی نیم سرکاری خبر رساں ایجنسی ”فارس“ کے مطابق، اسرائیل کی جانب سے ایران کے شہر اصفہان میں واقع جوہری تنصیب کو بھی نشانہ بنایا گیا ہے۔ تاہم فارس نیوز ایجنسی نے یہ بھی بتایا کہ حملے کے نتیجے میں کسی قسم کے خطرناک مواد کے اخراج کی اطلاع نہیں ملی۔
قبل ازیں، اسرائیلی میڈیا کے مطابق دارالحکومت تل ابیب میں دھماکوں کی آوازیں سنی گئی تھیں، جبکہ رہائشی علاقوں میں شدید خوف و ہراس پھیلا ہوا ہے۔ مقامی حکام نے شہریوں کو محفوظ پناہ گاہوں میں منتقل ہونے کی ہدایات جاری کر دی ہیں۔
