اسرائیل نے لبنان پر حملے تیز کر دئیے ہیں۔ اسرائیلی فوج نے حزب اللہ کے میزائل یونٹ کے سربراہ محمد علی اسماعیل اور ان کے نائب حسین احمد اسماعیل کو شہید کرنے کا دعویٰ کیا ہے، اسرائیلی میڈیا کے مطابق میزائل حملے میں حزب اللہ کے سربراہ حسن نصراللہ کی بیٹی زینب بھی شہید ہوئی ہیں تاہم حزب اللہ نے اس دعوے کی تصدیق یا تردید نہیں کی ہے۔
گزشتہ روز حزب اللہ سربراہ حسن نصراللہ کو نشانہ بنانے کے لیے اسرائیلی طیاروں نے بیروت میں حزب اللہ کے ہیڈ کوارٹر پر حملے کیے جس میں میں 6 عمارتیں تباہ ہوئیں تھیں جبکہ 8 افراد شہید اور 90 سے زائد زخمی ہوئے تھے۔
ایران کا دعویٰ ہے کہ حسن نصراللہ محفوظ ہیں، ایران کے روحانی پیشوا آیت اللہ خامنہ ای کا کہنا ہے کہ حسن نصر اللہ کو اگر کچھ ہو بھی جاتا ہے تو حزب اللہ کے پاس متبادل لیڈر شپ موجود ہے۔ خیال رہے کہ اسرائیل کے لبنان پر ایک ہفتے کے دوران حملوں میں شدت دیکھنے میں آئی ہے اور اسرائیلی فوج کے حملوں میں اب تک 700 سے زائد لبنانی شہری جن میں خواتین اور بچے بھی شامل ہیں جاں بحق ہو چکے ہیں جبکہ سیکڑوں کی تعداد میں افراد زخمی بھی ہوئے ہیں۔
