خیبرپختونخوا میں سیکیورٹی فورسز نے 2 الگ الگ کارروائیوں میں 9 دہشت گردوں ہلا ہو گئے ہیں جبکہ دہشتگردوں کی فائرنگ سے 2 جوان شہید ہو گئے ۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق دہشتگردوں کی موجودگی کی اطلاع پر ضلع مہمند میں ایک انٹیلی جنس پر مبنی آپریشن کیا گیا، جس میں 7 دہشتگرد ہلاک ہو گئے ۔
ترجمان پاک فوج کے مطابق آپریشن کے دوران سیکیورٹی فورسز نے خوارج کے مقام کو مؤثر طریقے سے نشانہ بنایا، دہشتگردوں کے ساتھ شدید فائرنگ کے تبادلے کے دوران ضلع ملاکنڈ کے رہائشی حوالدار محمد زاہد اور ضلع چترال کے رہائشی سپاہی آفتاب علی شاہ نے بہادری سےلڑتے ہوئے شہادت کو گلے لگا لیا ۔
آئی ایس پی آر کے مطابق دوسری کارروائی ڈیرہ اسماعیل خان کے علاقے مدی میں کی گئی، اس دوران سیکیورٹی فورسز اور خوارج کے درمیان فائرنگ کا تبادلہ ہوا، جس کے نتیجے میں 2 دہشتگرد ہلاک ہو گئے ۔
بیان کے مطابق ہلاک دہشتگردوں کے قبضے سے ہتھیار اور گولہ بارود بھی برآمد کیا گیا، ہلاک دہشت گرد متعدد دہشت گردانہ سرگرمیوں میں ملوث تھے ۔
ترجمان پاک فوج نے کہا کہ اس علاقے میں پائے جانے والے کسی دوسرے خوارجی کو ختم کرنے کے لیے سینیٹائزیشن کی جا رہی ہیں، پاکستان کی سکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں ۔
