بیروت: لبنان میں پیجرز دھماکوں کے بعد،گزشتہ روز ہزاروں واکی ٹاکی ڈیوائسز اچانک دھماکوں سے پھٹ پڑے جس کے نتیجے میں 20لوگ ہلاک ہو گئے ـ
غیر ملکی خبر رساں ادارے کے مطابق گزشتہ روز اچانک لبنان کے مختلف علاقوں میں واکی ٹاکی (ریڈیو ) ڈیوائسز میں دھماکے ہوئے جس کے نتیجے میں بہت سے لوگ جاں بحق ہوگئے ـ اب تک جاں بحق ہونے والوں کی مجموعی تعداد 20 ہوگئی ہے جب کہ ان دھماکوں کے نتیجے میں 450 سے زائد افراد زخمی ہوگئے ہیں ـ
رپورٹس کے مطابق ،گزشتہ روز واکی ٹاکی دھماکے بازاروں، گھروں اور ڈیوائسز میں دھماکوں کے دوسرے مرحلے میں جاں بحق ہونے والے افراد کے جنازوں کے دوران بھی ہوئے ہیں ـ سینکڑوں کی تعداد میں لوگ زخمی ہوئے اور ان کو اسپتال لائےجانے کے باعث اسپتال شہریوں سے بھرگئے ہیں۔
رپورٹس کے مطابق گزشتہ دو دنوں سے دھماکے ہورہے ہیں ،لیکن اب تک اس پر اسرائیلی حکام نے کوئی آفیشل بیان نہیں دیا ـ لیکن سکیورٹی ذرائع کا کہنا ہے کہ ان دھماکوں کے پیچھے اسرائیلی ایجنسی موساد کا ہاتھ ہے۔
رپورٹس کے مطابق گزشتہ روز لبنان میں ہونے والے پیجرز دھماکوں میں لبنانی وزیر کے بیٹے سمیت 14 افراد جاں بحق اور 4 ہزار سے زائد افراد زخمی ہوئے تھے۔
پیجر دھماکے میں ایرانی سفیر مجتبیٰ امانی بھی زخمی ہوئے تھے ـ جن کے حوالے سے امریکی اخبار نے دعویٰ کیا ہے کہ دھماکے میں ایرانی سفیر ایک آنکھ سے محروم ہو گئے ہیں ـ جب کہ ان کی دوسری آنکھ بھی شدید متاثر ہوئی ہے ـ تاہم ایرانی حکام نے اس قسم کی تمام اطلاعات کی تردید کی ہے۔
