بلوچستان کے ضلع نوشکی میں ٹرک اڈہ کے قریب آگ لگنے کے بعد تیل سے بھرے ٹرک میں دھماکہ ہوا جس کے نتیجے میں متعدد افراد جھلس کر زخمی ہوگئے ،اس دوران آگ بجھاتے ہوئے فائر بریگئیڈ کی گاڑی کو بھی آگ لگ گئی ۔
رپورٹ کے مطابق نوشکی کی ضلعی انتظامیہ نے ایک بیان میں کہا کہ دھماکے میں 40 سے زائد افراد زخمی ہوئے ہیں، ٹرک اڈہ میں کھڑے آئل ٹینکر کی ٹینکی میں لگی آگ پر قابو پانے کی کوششوں کے دوران واقعہ پیش آیا ۔
اس کے علاوہ شہریوں کو جائے وقوع سے ہٹانے کےلئے موجود 4 پولیس اہلکار بھی جھلس کر زخمی ہوئے ہیں، آئل ٹینکر کے قریب موجود افراد 70 سے 80 فیصد جھلس گئے جن کو ہسپتال منتقل کردیا گیا ہے ۔
بلوچستان حکومت کے ترجمان شاہد رند نے کہا کہ نوشکی میں ٹرک میں آگ بھڑک اٹھنے کا افسوسناک واقعہ ہوا، آگ کی شدت سے موقع پر موجود فائر بریگیڈ کی گاڑی بھی متاثر ہوئی ہے ۔
اُن کا کہنا تھا کہ اسپتالوں میں ایمرجنسی نافذ، متاثرہ افراد کو طبی امداد فراہم کی جاررہی ہے جبکہ واقعے کی تحقیقات کے لئے متعلقہ حکام کو ہدایت جاری کردیں ۔
