ممبئی: معروف بھارتی گلوکار کمار سانو نے بانی پی ٹی آئی کے لیے گانا گانے کی تردید کردی۔
کمار سانو نے اپنے آفیشل انسٹاگرام ہینڈل پر وضاحتی پوسٹ جاری کرتے ہوئے کہا کہ میں نے پاکستان کے سابق وزیراعظم کے لیے کبھی کوئی گانا نہیں گایا۔
کمار سانو کا کہنا تھا کہ سوشل میڈیا پر گردش کرنے والی آڈیو میری آواز نہیں ہے بلکہ وہ آواز آرٹیفیشل انٹیلجنس (اے آئی) کا استعمال کرکے بنائی گئی ہے۔
ان کا کہنا تھا کہ کچھ لوگ مجھے بدنام کرنے کی کوشش کر رہے ہیں، اسی لیے میں اپنے مداحوں کو بتانا چاہتا ہوں کہ گانے سے متعلق خبر جعلی ہے اور جھوٹی ہے۔
اُنہوں نے بھارتی حکومت سے اپیل کرتے ہوئے مزید کہا کہ یہ ٹیکنالوجی کا سنگین اور غلط استعمال ہے، میں آپ سے درخواست کرتا ہوں کہ اے آئی اورڈیپ فیک ٹیکنالوجی کے غلط استعمال کو روکنے کے لیے فوری کارروائی کی جائے۔
واضح رہے کہ گزشتہ دنوں سوشل میڈیا پر ایک ویڈیو وائرل ہوئی تھی جس میں کمار سانو کو بانی پی ٹی آئی کی رہائی کے لیے کنسرٹ میں گانا گاتے ہوئے دکھایا گیا تھا، مذکورہ ویڈیو کی آڈیو آرٹیفیشل انٹیلجنس (اے آئی) کی مدد سے تیار کی گئی تھی۔
