اسلام آباد: بیرونِ ملک مقیم پاکستانیوں نے فقط تین ماہ میں آئی ایم ایف کے 3 سالہ پروگرام سے زائد ڈالر پاکستان بھیج دیے۔ یہ تفصیلات اسٹیٹ بینک آف پاکستان نے ماہ ستمبر 2024ء میں ورکرز ترسیلات زر کے ضمن میں جاری کیں۔ ترسیلات زر ستمبر 2024ء میں 2.8 ارب ڈالرز رہیں جو کہ ستمبر 2023ء کے مقابلے 29 فیصد زائد ہیں۔
تفصیلات کے مطابق سعودی عرب سے ستمبر میں 68 کروڑ ڈالر اور متحدہ عرب امارات سے 56 کروڑ ڈالر بھیجے گئے ہیں۔تین مہینوں میں ورکرز ترسیلات کی ماہانہ اوسط 2.92 ارب ڈالر رہیں۔ سعودی عرب میں مقیم پاکستانیوں نے 3 ماہ میں 2.15 ارب ڈالر بھیجے۔متحدہ عرب امارات میں مقیم پاکستانیوں نے 3 ماہ میں 1.70 ارب ڈالر بھیجے جبکہ دیگر خلیجی ممالک سے تین مہینوں میں 86 کروڑ ڈالر بھیجے گئے۔ برطانیہ میں مقیم پاکستانیوں نے 3 ماہ میں 1.34 ارب ڈالر بھیجے ہیں۔یورپ کے دوسرے ممالک میں مقیم پاکستانیوں نے 3 ماہ میں 1.09 ارب ڈالر جبکہ امریکہ سے 3 مہینوں میں 89 کروڑ ڈالر پاکستان بھیجے گئے۔
