مقبوضہ کشمیر میں پاکستان ایئرفورس کے خوف کا شکار بھارتی رافیل طیارے بوکھلاہٹ کا شکار ہوکر واپس فرار ہونے پر مجبور ہو گئے ۔
سکیورٹی ذرائع کے مطابق گزشتہ بھارتی ائیر فورس کے 4 رافیل طیاروں نے بھارتی جغرافیائی حدود میں رہتے ہوئے مقبوضہ جموں کشمیر میں پیٹرولنگ کی، جسے پاک فضائیہ نے بروقت کارروائی کرتے ہوئے واپس فرار ہونے پر مجبور کردیا ۔
اس موقع پر پاکستان ائیر فورس کے طیاروں نے ہندوستانی ائیر فورس کے ان جنگی جہازوں کی فوراً نشان دہی کر لی،جس کے بعد پاکستانی ائیر فورس کی بروقت اور مستعد کارروائی پرانڈین رافیل طیارے بوکھلاہٹ کا شکار ہو کر راہ فرار اختیار کر گئے ۔
سکیورٹی ذرائع کا کہنا ہے کہ پاکستانی افواج ہندوستان کی طرف سے کسی بھی جارحیت کا منہ توڑ جواب دینے کے لیے ہمہ وقت تیار اور مستعد ہیں ۔
مستند انٹیلی جنس اطلاعات کے مطابق جنگی جنون میں مبتلا بھارت، پاکستان کےخلاف کسی بھی وقت فوجی کارروائی کرسکتا ہے جب کہ بھارت کی کسی مہم جوئی کا یقینی اور سخت جواب دینے کے لیے مسلح افواج مکمل تیار ہیں ۔
ذرائع کے مطابق پاکستانی عوام مسلح افواج کے شانہ بشانہ بھارت کو دندان شکن جواب دینے کے لیے تیار ہیں، پاکستانی قوم مسلح افواج کے ساتھ مل کر اپنی خودمختاری اور علاقائی سالمیت کا ہرقیمت پر دفاع کرے گی ۔
