عالمی امن اور معیشت کے حوالے سے پاکستان اور آسٹریلیا کے وزرائے خارجہ کے درمیان ٹیلیفونک رابطہ

نائب وزیر اعظم و وزیر خارجہ سینیٹر محمد اسحاق ڈار نے آسٹریلیا کی وزیر خارجہ پینی وونگ سے ٹیلیفون پر گفتگو کی ہے۔
آسٹریلوی وزیر خارجہ پینی وونگ نے نائب وزیر اعظم و وزیر خارجہ کی کوششوں کو سراہتے ہوئے ایران اور امریکہ کے درمیان مذاکرات میں پاکستان کے تعمیری کردار کی تعریف کی۔ انہوں نے اس حوالے سے سفارتی روابط کے فروغ کے لیے پاکستان کے مسلسل عزم کو بھی قابلِ ستائش قرار دیا۔
نائب وزیر اعظم و وزیر خارجہ نے انہیں 11 اور 12 اپریل کو اسلام آباد میں ہونے والے مذاکرات سے آگاہ کیا اور اس عزم کا اعادہ کیا کہ پاکستان مکالمے اور تعمیری روابط کے فروغ کے لیے اپنی کوششیں جاری رکھے گا۔ دونوں رہنماؤں نے عالمی معیشت پر وسیع تر اثرات، خصوصاً ترقی پذیر ممالک کے لیے درپیش چیلنجز پر تشویش کا اظہار کیا اور تنازعات کے پرامن حل کی اہمیت پر زور دیا۔