اسلام آباد میں میڈیا سے گفتگو کرتے ہوئے پیپلز پارٹی کے سینئر رہنما اور چیئرمین سینیٹ یوسف رضا گیلانی نے کہا ہے کہ وزیراعظم کوئی فیصلہ کریں گے تو نیشنل سکیورٹی اور قومی معاملات پر ان کا ساتھ دیں گے، ون پوائنٹ ایجنڈے پر ملک کی سکیورٹی اور تحفظ کیلئے تمام جماعتوں کو اختلافات بھلا کر ایک ہونا ہو گا۔
یوسف رضا گیلانی نے کہا ہے کہ سیاستدانوں کے آپس میں مذاکرات ہونے چاہئیں، وزیراعظم شہباز شریف کو سیاسی جماعتوں کے مذاکرات کی سربراہی کرنی چاہیے۔ آپ کسی لیڈر سے اختلاف کر سکتے ہیں پاکستان سے نہیں۔
یوسف گیلانی نے مزید کہا کہ پیپلز پارٹی نے ہمیشہ مذاکرات کیے ہیں، تمام سیاسی جماعتوں سے مذاکرات ہونے چاہیئں ۔ہم نے اپوزیشن میں نوازشریف سے بات کی اور چارٹر آف ڈیموکریسی پر دستخط کیے۔ا س وقت ٹیم کے کپتان شہباز شریف ہیں، انہیں فیصلے کرنے چاہئیں اور آگے بڑھنا چاہیے۔
چیئرمین سینیٹ نے کہا کہ نوجوان کسی کے بہکاوے میں نہ آئیں، پاکستان ہے تو آپ کی عزت ہے۔ مولانا فضل الرحمان سے پرانی وابستگی ہے، وہ زیرک سیاستدان ہیں، ہم چاہتے ہیں مل کر ملک اور قوم کی خدمت کریں۔
یوسف رضا گیلانی کا کہنا تھا کہ پاکستان امن پسند ملک ہے، پاکستان کسی سے لڑنا نہیں چاہتا مگرپاکستان پر کسی قسم کا حملہ ہوا تو قوم مل کر جواب دے گی۔
