وزیراعظم شہباز شریف وفاقی وزرا کے وفد کے ہمراہ نیویارک پہنچ گئے ہیں۔ پاکستانی اعلیٰ سطح کا وفد اقوام متحدہ کی جنرل اسمبلی میں شرکت کرے گا ۔
پاکستان وفد میں وزیراعظم کے ہمراہ وزیر دفاع خواجہ آصف، وزیر اطلاعات و نشریات عطاء اللہ تارڑ، خالد مقبول صدیقی اور معاون خصوصی طارق فاطمی شامل ہیں۔
اقوام متحدہ کے سیکرٹری جنرل انتونیو گوتریس نے رکن ممالک کے سربراہان کیلئے استقبالیہ رکھا ہے جس میں آج وزیراعظم شرکت کریں گے۔
وزیراعظم شہباز شریف کی مختلف ممالک کے سربراہاں کے ساتھ غیر رسمی ملاقاتیں بھی ہوں گی جب کہ وزیراعظم اقوام متحدہ جنرل اسمبلی کے اجلاس 2024 کی افتتاحی تقریب میں شرکت کریں گے۔
اس کے علاوہ وزیراعظم شہباز شریف کی مالدیپ کے صدر محمد معیزو اور بنگلہ دیش کی عبوری حکومت کے سربراہ ڈاکٹر یونس سمیت دیگر عالمی رہنماوں سے ملاقاتیں کریں گے ۔
