وزیراعظم محمد شہباز شریف سعودی ولی عہد شیخ محمد بن سلمان کی دعوت پر دورہ سعودی عرب کیلئے پہنچ گئے، وزیراعظم کے ساتھ وفد میں فیلڈ مارشل عاصم منیر اور وفاقی وزرا بھی شامل ہیں ۔
وزیرِاعظم کی دورہ سعودی عرب کے دوران سعودی ولی عہد و وزیرِاعظم شہزادہ محمد بن سلمان بن عبدالعزیز آلسعود کے ساتھ ملاقات ہوگی جس میں پاکستان اور سعودی عرب کے مابین دیرینہ برادرانہ تعلقات اور شراکت داری کو مزید مضبوط کرنے اور خطے کی صورتحال پر تبادلہ خیال ہوگا ۔
وزیرِاعظم کے ہمراہ نائب وزیرِ اعظم و وزیرِ خارجہ محمد اسحاق ڈار، چیف آف ڈیفنس فورسز فیلڈ مارشل سید عاصم منیر، وفاقی وزراء خواجہ محمد آصف، عطاء اللہ تارڑ اور معاون خصوصی طارق فاطمی بھی وفد میں شامل ہیں ۔
وزیرِاعظم شہبازشریف اپنے دورہ سعودی عرب کے دوران عمرہ کی ادائیگی کریں گے اور مدینہ منورہ میں روضہ رسول ﷺ پر حاضری بھی دیں گے ۔
وزیراعظم کا دورہ سعودی عرب دونوں ممالک کے مابین دہائیوں پر محیط دیرینہ برادارنہ تعلقات، باہمی اعتماد اور بھائی چارے کی عکاسی کرتا ہے، یہ دورہ خطے کی صورتحال کے قلیل مدتی اثرات کے پس منظر کو مدنظر رکھتے ہوئے ہو رہا ہے ۔
یہ دورہ دونوں ممالک کے مابین تزویراتی تعاون، باہمی تعلقات، علاقائی و بین الاقوامی امور پر ہم آہنگی و تعاون کو وسعت دے گا ۔
