پاکستان تحریک انصاف خیبر پختونخوا کے صدر جنید اکبر کی مشاورت سے خیبر پختونخوا اسمبلی میں پی ٹی آئی کی پارلیمانی پارٹی کے اندر موجود اختلافات کو ختم کرنے کے لیے چھ رکنی کمیٹی تشکیل دے دی گئی ہے۔ کمیٹی کی سربراہی سابق اسپیکر قومی اسمبلی اسد قیصر کو سونپی گئی ہے۔
پارٹی کے صوبائی جنرل سیکریٹری علی اصغر خان کی جانب سے جاری اعلامیے کے مطابق کمیٹی کو "پارلیمانی اینڈ پولیٹیکل کوآرڈینیشن کمیٹی” کا نام دیا گیا ہے، جس کا مقصد پارٹی کے اندر ہم آہنگی کو فروغ دینا اور اختلافات کے حل کے لیے مؤثر کردار ادا کرنا ہے۔
اعلامیے کے مطابق کمیٹی میں خیبر پختونخوا اسمبلی کے اسپیکر بابر سلیم سواتی، قومی اسمبلی کے رکن محمد عاطف خان، صوبائی وزیر مینا خان آفریدی، چیف وہیب اکبر ایوب خان اور علی اصغر خان شامل ہیں۔
پارٹی قیادت نے کمیٹی کو پارلیمانی پارٹی کے ارکان کے درمیان پائے جانے والے اختلافات کے خاتمے، باہمی رابطوں کے فروغ اور سیاسی و پارلیمانی امور میں بہتر کوآرڈینیشن یقینی بنانے کی ذمہ داری سونپ دی ہے۔ اعلامیے میں امید ظاہر کی گئی ہے کہ کمیٹی اپنی ذمہ داریاں مؤثر انداز میں انجام دیتے ہوئے پارٹی کے اندر اتحاد اور نظم و ضبط کو مزید مضبوط بنائے گی۔
