سعودی وزارت اسلامی امور و دعوت و رہنمائی نے پاکستان کی وزارت مذہبی امور کے ساتھ ایک مفاہمت کی یادداشت پر دستخط کیے ہیں۔
وزارت اسلامی امور کے آفیشل اکاؤنٹ پر جاری کردہ بیان کے مطابق، اس موقع پر وزیر اسلامی امور ڈاکٹر عبداللطیف بن عبدالعزیز آل شیخ بھی موجود تھے۔ مفاہمتی یادداشت پر سعودی وزارت کے انڈر سیکریٹری ڈاکٹر عواد بن سبتی العنزی اور پاکستانی وزارت کے انڈر سیکریٹری ذوالفقار حیدر نے دستخط کیے۔
اس معاہدے کا مقصد کئی شعبوں میں تعاون کو فروغ دینا ہے جن میں قرآن پاک کی اشاعت و ترجمہ، مبلغین اور اماموں کی تربیت، مساجد کی تعمیر اور دیکھ بھال شامل ہیں۔
اس معاہدے میں اسلامی ورثے کی بحالی، اسلامی علوم کی ترویج، اور اسلامی کانفرنسوں اور سیمینارز میں علما کی شرکت کی حوصلہ افزائی پر بھی زور دیا گیا ہے۔
یہ اقدام سعودی عرب کی جانب سے اسلام اور مسلمانوں کی خدمات میں کردار کو مزید اجاگر کرتا ہے۔
