اسلام آباد: سپریم کورٹ آف پاکستان میں تعینات ہونے والے 7 نئے ججز نے حلف اٹھا لیا، چیف جسٹس یحیٰ آفریدی نے نئے ججز سے ان کے عہدوں کا حلف لیا ۔
چیف جسٹس پاکستان جسٹس یحییٰ آفریدی نے سپریم کورٹ میں تعینات ہونے والے 6 مستقل اور ایک قائم مقام جج سے حلف لیا، اس موقع پر دیگر ججز بھی موجود تھے ۔
سپریم کورٹ میں تعیناتی کا حلف اٹھانے والے ججز میں جسٹس عامر فاروق، جسٹس ہاشم کاکڑ، جسٹس اشتیاق ابراہیم، جسٹس شکیل احمد، جسٹس شفیع صدیقی اور جسٹس صلاح الدین پنہور شامل ہیں ۔
ان 6 مستقل ججز کے علاوہ ساتویں جج جسٹس میاں گل حسن اورنگزیب نے بھی ایکٹنگ جج سپریم کورٹ کے طور پر عہدے کا حلف اٹھایا ۔
اسلام آباد ہائیکورٹ کے جج محسن اختر کیانی بھی تقریب حلف برداری میں شریک تھے۔ ان کے علاوہ اٹارنی جنرل، وکلا، لا افسران، عدالتی سٹاف اور صحافیوں نے بھی تقریب حلف برداری میں شرکت کی ۔
