سیکیورٹی ذرائع کے مطابق جنوبی وزیرستان اپر میں دہشتگردوں نے سیکیورٹی فورسز کی رغزائی پوسٹ پر حملہ کیا، جس کے نتیجے میں 4 اہلکار شہید اور 7 زخمی ہو گئے۔ سیکیورٹی ذرائع کے مطابق حملہ اچانک کیا گیا، جس کے بعد علاقے میں شدید فائرنگ کا تبادلہ ہوا۔
حملے کے فوری بعد سیکیورٹی فورسز نے جوابی کارروائی کی، جس میں کئی دہشتگرد ہلاک اور متعدد زخمی ہو گئے۔ زخمی اہلکاروں کو قریبی فوجی ہسپتال منتقل کر دیا گیا، جہاں انہیں طبی امداد فراہم کی جا رہی ہے۔
واقعے کے بعد علاقے میں سیکیورٹی مزید سخت کر دی گئی ہے، اور فورسز نے سرچ آپریشن کا آغاز کر دیا ہے تاکہ حملے میں ملوث دہشتگردوں کا خاتمہ کیا جا سکے۔ حکام کے مطابق دہشتگردوں کی نقل و حرکت پر گہری نظر رکھی جا رہی ہے اور علاقے میں امن و امان برقرار رکھنے کے لیے تمام ضروری اقدامات کیے جا رہے ہیں۔
